ٹکٹ
ٹِکَٹ {ٹِکَٹ} (انگریزی)
Ticket، ٹِکَٹ
اصلاً انگریزی زبان کا لفظ ہے اور بطور اسم مستعمل ہے۔ اردو میں انگریزی سے ماخوذ ہے اور اصلی حالت اور اصلی معنی میں ہی اردو رسم الخط میں بطور اسم مستعمل ہے۔ 1859ء میں "خطوط غالب" میں مستعمل ملتا ہے۔
اسم نکرہ (مذکر - واحد)
جمع استثنائی: ٹِکَٹْس {ٹِکَٹْس}
جمع غیر ندائی: ٹِکْٹوں {ٹِک + ٹوں (واؤ مجہول)}
فہرست |
[ترمیم] معانی
1. دفتی یا کاغذ کا وہ چھپا ہوا چھوٹا ٹکڑا جس پر مسافر کے سوار ہونے اور اترنے کے اسٹیشنوں کے نام اور سفر کے کرائے کی رقم تحریر ہوتی ہے اور جو کرایہ ادا کر کے لیا جاتا ہے۔
"اگر آپ کل شام یا 20 کی صبح لاہور پہنچ سکیں تو ٹکٹ صرف لاہور ہی تک کا خرید کریں۔"، [1]
2. وہ چھوٹا سا رنگین کاغذ کا سرکاری طور پر منظور شدہ چھپا ہوا ٹکڑا جو ڈاک کا محصول ادا کر دیے جانے کے ثبوت میں ڈاک خانے سے ملتا ہے اور جس پر مختلف قیمتیں تحریر ہوتی ہیں، ڈاک خانے کے محصول کا اسٹامپ۔
"بھائی مسودہ روانہ کرنے کے لیے ٹکٹ چاہئیں۔"، [2]
3. وہ پرزہ جس پر زر موصولہ یا شے موصولہ کی رسید کے لیے دستخط کیے جاتے ہیں۔
"ہر شخص کے ہتھیار ایک خاص مقام پر حکم سرکار سے چھین کر جمع کرتے ہیں اور اس کو ایک ٹکٹ ملتا ہے۔"، [3]
4. کسی سیر تماشے نمائش وغیرہ کو دیکھنے کا اجازت نامہ جو قیمت ادا کرنے پر ملتا ہے۔
"ایک عجائب خانہ یہاں قائم کر دیا جائے ----- اس کے داخلہ کے لیے ایک ٹکٹ مقرر کرایا جا سکتا ہے۔"، [4]
5. ملاقاتی کارڈ۔
"صاحب موصوف نے اپنا ٹکٹ اوپر بھیجا میں ان کے استقبال اور بغل گیری کے واسطے نیچے اتر آیا۔"، [5]
6. اجازت نامہ، پرمٹ۔
"سب تھانوں پر حکم ہے کہ دریافت کرو، کون بے ٹکٹ مقیم ہے اور کون ٹکٹ رکھتا ہے۔"، [6]
7. وہ اجازت نامہ جو کسی الیکشن کے امیدوار کے حق میں کسی سیاسی پارٹی کی جانب سے اس لیے جاری کیا جائے کہ وہ امیدوار اس پارٹی کی جانب سے حصہ لینے کا مجاز ہو۔
"لیکن اس کے ٹکٹ پر جو لوگ کامیاب ہوئے وہ سیلاب کی سطح پر تنکوں کی طرح بھی تھے۔"، [7]
8. گتے یا لوہے کی چھوٹی تختی جس پر نمبر یا نام وغیرہ لکھ کر لگاتے ہیں (کارخانوں، محکموں اور جیلوں وغیرہ میں یہ طریق رائج ہے)؛ وہ کیفیت نامہ جس پر کسی شخص کے نام کے ساتھ کسی خاص مقصد سے متعلق کوائف درج ہوں۔
"فی سال ایک ماہ کے حساب سے رہائی کل قیدیوں کے ٹکٹوں پر چڑھا دی گئی۔"، [8]
9. سرکاری طور پر تعلیقہ یا ضبطی کرنے کے بعد کسی ادارہ یا دکان وغیرہ پر قفل لگا کر محکمۂ مجاز کا دستخطی پرچہ یا مہر۔
"سینکڑوں دکانوں میں قفل پڑے سرکاری ٹکٹ لگے۔"، [9]
10. اجازت نامہ جو بدکار عورتوں کے پاس ہوتا ہے۔
(جامع اللغات)
11. سوداگری کے مال کا پرچہ جس پر کارخانے کا نام لکھا ہوتا ہے۔ (جامع اللغات)
12. چھتری کے کپڑے کے درمیانی سوراخ کی گوٹ جو سوراخ کے اطراف غلاف کی حفاظت کو لگائی جاتی ہے۔ (اصطلاحات پیشہ وراں، 7:1)
13. پروانۂ راہداری، پاسپورٹ؛ تاگوں کا پتا، ریل، پیچک؛ چندہ، قیمت، اجرت؛ ٹیکس، محصول، لگان، سوداگری، مال کا خاص محصول۔ (نوراللغات؛ پلیٹس؛ جامع اللغات)
[ترمیم] انگریزی ترجمہ
ticket
[ترمیم] مترادفات
سَٹیمْپ، طابِع،
[ترمیم] مرکبات
ٹِکَٹ چیکَر، ٹِکَٹ زَدَہ، ٹِکَٹ کَلَکْٹَر، ٹِکَٹ گھَر، ٹِکَٹ مُنْشی، ٹِکَٹ بابُو
[ترمیم] حوالہ جات
- ↑ ( 1933ء، اقبال نامہ، 177:1 )
- ↑ ( 1945ء، تلخ شیریں اور شیریں، 133 )
- ↑ ( 1880ء، ماسٹر رام چندر، 196 )
- ↑ ( 1926ء، شرر، مشرقی تمدن کا آخری نمونہ، 522 )
- ↑ ( 1892ء، اصول سراغ رسانی، 171 )
- ↑ ( 1859ء، خطوط غالب، 273 )
- ↑ ( 1976ء، نوائے وقت لاہور، 20 اگست )
- ↑ ( 1905ء، قیدفرنگ، 72 )
- ↑ ( 1913ء، چھلاوہ، 2 )
