ا

مزید دیکھیے: الف مفتوح، الف مکسور، اور الف مضموم

الف مقصورہ اردو، عربی، فارسی، پینجابی، سندھی، پشتو، اور بلوچی حروف تہجی کا پہلا حرف۔ ہندی میں بطور حرف علت استعمال ہوتا ہے۔
مصر کے ہیرو غلیفی خط میں "ا" بیل کے سر سے تعبیر کیا جاتا تھا۔ قدیم مصری زبان میں بیل کو آدا کہتے تھے۔اس لیے ہجائی رسم تحریر کے وقت فنیقی زبان میں اس کا نام الف ہوا۔
عربی میں الف کی دو قسمیں ہیں۔ یعنی الف ممدودہ آ اور الف مقصورہ ا ۔
الف ممدودہ کو کھینچ کر پڑھتے ہیں اور اس کے اوپر مد ہوتا ہے جیسے آپ، آگ، آمد۔ جبکہ الف مقصورہ کو الف ممدودہ کی مانند کھینچ کر نہیں پڑھتے جیسے اگر، اَٹل۔

عربی میں مقصورہ اس کو کہتے ہیں جس کے بعد ہمزہ نہ ہو۔ جیسے خطایا میں عربی میں ۔ ی کے اوپر نصف الف کی صورت میں لکھتے ہیں جیسے عیسٰی ۔ مصطفیٰ وغیرہ میں۔ گویا عربی میں مقصورہ الف ساکن کو کہتے ہیں جس کے بعد ہمزہ نہ ہو مگر کھینچ کر پڑھا جائے اور دو زبر کے برابر ہو اس کے برعکس اردو، کھوار اور فارسی میں الف مقصورہ متحرک بھی ہوتا ہے۔ مثلا اگر اِس ۔ اُن وغیرہ میں اور ساکن بھی ہوتا ہے، مثلا مال ، سال ، جالا وغیرہ میں مگر مد والے حرف کی طرح کھینچ کر نہیں پڑھا جاتا ۔ اگر الف متحرک ہو تو عربی میں اسے ہمزہ کہتے ہیں۔

علامتی معنی

علامتی اعتبار سے الف کے معنی ہیں: خدائے واحد، صیقل کی لکیر، راستی، راست بازی، مفرد، اکیلا، ایک، مجرد، ننگا، دلیر، بہادر

عدد

حساب ابجد میں اس کا عدد ایک ہے۔

کلمہ کے وسط میں استعمال

کلمہ کے وسط میں الف مندرجہ ذیل حالتوں میں ان علامات کے طور پر استعمال ہوتا ہے۔

حرفِ اتصال

عطف کے لیے جیسے تگاپو (تگ اور پو)

حرفِ اضافت

موسلادھار، موتیابند، سوتیاڈاہ، بھیڑیا چال

مابینِ متجانسین

رنگارنگ، چھماچھم، گرماگرم، مارا مارا

انحصار و استیعاب

سراپا (سر سے پا تک) ، مونہا منہ

علامتِ فاعل

قاتل، عالم

علامتِ جمع

مساجد، مذاہب

کلمہ کے آخر میں استعمال

کلمہ کے آخر میں الف مندرجہ ذیل حالتوں میں ان علامات کے طور پر استعمال ہوتا ہے۔

علامتِ تعدیہ

جلنا سے جلانا، چلنا سے چلانا، نکلنا سے نکالنا

علامتِ ماضی مطلق

چلا، اُٹھا، سُنا

علامتِ حالئہ تمام

کھلا ، کھلا ہوا

علامتِ تذکیر

بھینسا، مرغا، بڑا

علامتِ تانیث

مالا، بیوا، رادھا، صضریٰ، کبریٰ، علیا، سلمہا

علامتِ صفت

اونچا، جھوٹا، نیچا

علامتِ تکبیر

ٹوکرا، مٹکا

حرفِ الحاق

ڈورا، بلما، جوڑا

حرفِ ندا

ناصحا، خدایا

حرفِ ندیہ

حسرتا، دردا

حرفِ فاعلی

دانا، بینا، شنوا

حرفِ کثرت

خوشا، بہت اچھا

اَ الف مفتوح

حرفِ نفی

اَٹل، اَچھوت، اَمِٹ، اَمَر

حرفِ ندا

اَجی، اَبے

سابقہ بمعنی کثرت

اَچپل

حرفِ تفصیل

اشرف، اکبر

اُ الف مضموم

دور کا اشارہ

اُدھر، اُس

سابقہ بمعنی اوپر

اُٹھنا، اُکھڑنا، اُگلنا

سابقہ بمعنی نیچے

اُلٹ

اِ الف مکسور

قریب کا اشارہ

اِدھر، اِتنا

بدل

اِبن راصل میں "بنو" تھا

علامتِ مصدر

اِنتضار (عربی)

مزید دیکھیے

• اگلا حرف: ب‏ (ب)